"MYu" "miltiq"ni ko'tarib "ov"ga chiqmoqchi

Angliyada "Manchester Yunayted"ning qayta tuzilishi muhokama qilinmoqda. Express nashri xabariga ko'ra, "mankunianliklar" deyarli har bir pozitsiya uchun yangi o'yinchilar bilan shartnoma imzolashlari mumkin.

"Qizil iblislar" David de Xea o'rnini munosib tarzda to'ldira oladigan yangi zaxira darvozabonini taklif qilmoqchi. O'tgan mavsum Italiyada o'ynagan argentinalik Serxio Romero "Old Trafford"ga qaytishi mumkin.

Himoya chizig'ida "Yunayted" qanotlarda mustahkamlovchilarni qidirmoqda. Potentsial yangi keladiganlar orasida Denzel Dyumfries va Maks Aaronslar bor.

Pol Pogba ketganidan keyin klub markaziy yarim himoyachi sotib olish haqida o'ylagan. Ro'yxatga Yuri Tilemans va Sergey Milinkovich-Savich kiritilgan.

"Manchester Yunayted" hujum chizig'iga Antoni va Sebastyan Sheshkolarni ko'rib chiqmoqda. Agar Krishtianu Ronaldu jamoani tark etsa, klub yangi forvard bilan shartnoma imzolaydi.