"Portu" "MYu" futbolchisini ortga qaytarmoqchi

"Portu" o'zining sobiq himoyachisi, hozirda "Manchester Yunayted"da o'ynayotgan Aleks Tellesni o'z safiga qo'shib olmoqchi.

Jurnalist Ekrem Konurning ijtimoiy tarmoqlarda yozishicha, Portugaliya klubi braziliyalik futbolchini sotib olish optsiyasi bilan ijaraga olmoqchi.

Oldinroq, "Manchester Yunayted"ning yangi bosh murabbiyi Erik ten Xag Tellesga kelasi mavsumdagi rejalariga kiritilmaganini ma'lum qilgandi. Braziliyalik futbolchining agentlari unga yangi jamoa izlashmoqda, davogarlar orasida Frantsiyaning “Nitstsa” jamoasi ham bor.

Telles ancha vaqt "Portu"da o'ynagan. 2020 yilda braziliyalik futbolchi klubni tark etib, 15 million evro evaziga "Manchester Yunayted"ga o'tgan edi.