"Yuventus" "Liverpul" hujumchisi bilan shartnoma imzolashga yaqin turibdi

"Liverpul" hujumchisi Roberto Firmino "Yuventus"ga o'tishga yaqin turibdi, deb xabar bermoqda Corriere dello Sport.

Manbaning xabariga ko'ra, tomonlar 30 yoshli braziliyalik futbolchining Turin klubiga o'tishi borasida kelishuvga erishishga yaqin turibdi. Transfer summasi 19 million funtni (taxminan 22,5 million evro) tashkil qiladi.

Firminoning "Liverpul" bilan amaldagi shartnomasi kelasi yilning yozida tugaydi. Transfermarkt portali braziliyalik hujumchini 32 million evroga baholamoqda.

Avvalroq "mersisaydliklar" 2015 yildan buyon jamoa sharafini himoya qilib kelayotgan futbolchisi bilan xayrlashish niyatida emasligi haqida xabar berilgandi.

O'tgan mavsumda Firmino "qizillar" safida 35 ta o'yinda maydonga tushib, 11 ta gol urdi va 5 ta golga assistentlik qildi.