"Barselona" "Atletik"ning 31 yoshli himoyachisiga qiziqish bildirmoqda

"Barselona" "Atletik" himoyachisi Inigo Martinesga ko'z tikdi.

Kataloniya klubi "Atletik"ga 31 yoshli ispaniyalik futbolchi uchun yaxshi taklif bilan chiqishni ma'lum qilgan. Inigoning "Atletik" bilan amaldagi shartnomasi 2023 yilning yozida tugaydi va uning tovon puli 80 million evroni tashkil etadi.

"Atletik" futbolchiga tanlash imkoniyatini beradi: agar Inigo ketishga qaror qilsa va shartnomani uzaytirishdan bosh tortsa, klub uni sotish ustida ishlay boshlaydi. "Atletik" Inigo uchun olmoqchi bo'lgan minimal summa - 50 million evro.

Agar "Barselona" ikkinchi iqtisodiy dastagini ishga tushirganidan foydalanib, transfer taklifini bildirsa, "Atletik" buni futbolchi bilan muhokama qiladi. Martines allaqachon "Barselona"ning qiziqishidan xabardor.

2018 yilning yanvar oyida “Atletik” Martinesni “Real Sosedad”dan 32 million evro evaziga sotib olgandi.

O'tgan mavsumda Inigo "Atletik" safida 33 ta o'yin o'tkazib, 3 ta gol urgan va 9 ta sariq va 1 ta qizil kartochka olgan.