"Liverpul"ning sobiq futbolchisi Avstraliya chempionatiga yo'l olishi mumkin

"Liverpul"ning sobiq hujumchisi Lazar Markovich faoliyatini Avstraliya ligasida davom ettirishi mumkin. 28 yoshli futbolchi bilan "Sidney" klubi shartnoma imzolash niyatida.

Markovich 2014 yilda 35 million evro evaziga "Liverpul"ga o'tgan edi. "Qizillar" futbolchi uchun «Tottenxem», «Bavariya» va «Fiorentina» kabi klublarga qarshi kurashda g'alaba qozonishgandi. Biroq, qanot hujumchisi o'z salohiyatini namoyish eta olmadi va 2019 yil yanvar oyida "Fulxem" bilan shartnoma imzolashdan oldin klubni erkin agent sifatida tark etdi.

Futbolchi o'tgan mavsumni Serbiyaning "Partizan" jamoasida o'tkazdi, biroq 19ta o'yinda birorta ham samarali harakat qila olmadi.