Manba: "Manchester Yunayted" "Ayaks" bilan kelishuvga erishdi

"Manchester Yunayted" jamoasi bosh murabbiyi Erik ten Xag o'z jamoasi safida ko'rishni juda istayotgan futbolchi transferi deyarli yakunlandi. Jurnalist Fabritsio Romanoning ijtimoiy tarmoqlarda xabar berishicha, “qizil iblislar” Amsterdamning “Ayaks” klubidan Lisandro Martinesning transferi borasida kelishib olgan.

"Ayaks" o'z futbolchisi uchun bonuslar bilan birga 55 million evro ishlab oladi. Argentinalik futbolchi “Manchester Yunayted” bilan 2027 yilgacha shartnoma imzolaydi. Eslatib o'tamiz, Martinesda Londonning "Arsenal" klubiga o'tish imkoniyati ham bor edi.

Shu tariqa, Martines "Manchester Yunayted"ning ushbu transfer oynasidagi uchinchi transferi bo'lishi kerak. Klub avvalroq “Feyenoord” klubidan Tirell Malasia va Kristian Eriksenni erkin agent sifatida o'z safiga qo'shib olgandi, biroq daniyalik futbolchining transfer hali rasman e'lon qilinmagan.