"MYu" futbolchisi APL debyutanti safiga o'tishga yaqin turibdi

Premer-liganing yangi a'zosi "Bornmut" "Manchester Yunayted" himoyachisini qo'lga kiritishga yaqin turibdi. Jurnalist Sem Lakxyorstning ijtimoiy tarmoqlarda yozishicha, gap o'tgan mavsumning ikkinchi yarmini "Napoli"da ijarada o'tkazgan Aksel Tuanzebe haqida ketmoqda. Bungacha angliyalik futbolchi olti oy davomida "Aston Villa" tarkibida o'ynadi.

Eslatib o'tamiz, Tuanzebe uch yildan beri muntazam o'yin amaliyotiga ega bo'lmayapti. Futbolchi "Aston Villa"da asosiy o'yinchi emas edi va "Napoli"da u Italiya A Seriyasining faqat bitta o'yinida maydonga tushdi.

Tuanzebe "Manchester Yunayted"ning yangi bosh murabbiyi Erik ten Xagning rejalariga kiritilmagan, shu bois futbolchiga shu yozda jamoani tark etishga ruxsat beriladi.