Dembelega APLning uchta klubi qiziqish bildirmoqda

"Lion" hujumchisi Mussa Dembelega "Manchester Yunayted", "Arsenal" va "Tottenxem" klublari qiziqish bildirmoqda.

Futbolchi avvalroq bir necha mavsumni “Fulxem” safida o'tkazib, Premer-ligada ham, Chempionshipda ham o'ynagan. London klubi safida 56 ta o'yinda maydonga tushib, 15 ta gol urgan. Shundan so'ng u faoliyatini "Seltik", "Lion" va "Atletiko" klublarida davom ettirgan.

O'tgan mavsumda Dembele "Barselona"ga o'tgan Memfis Depayning o'rnini muvaffaqiyatli egallab, "Lion" klubining asosiy hujumchisiga aylandi. Foot Mercato nashri xabariga ko'ra, yozgi transfer bozorida futbolchi Premer-ligaga qaytishi mumkin.

Frantsiya chempionatida Dembele 30 ta o'yin o'tkazib, 21 ta gol urdi va 4 ta golli uzatmani amalga oshirdi.