Levandovski uchun Londondan yana bir da'vogar topildi

Myunxenning "Bavariya" klubi markaziy hujumchisi Robert Levandovski Germaniya chempionatini Angliya Premer-ligasiga o'zgartirishi mumkin. Bu haqda Todofichajes nashri xabar tarqatmoqda.

Londonning "Arsenal" klubi 33 yoshli polshalik hujumchini transfer qilishni rejalashtirmoqda. "Kanonirlar" bosh murabbiyi Mikel Arteta Levandovskining transferini amalga oshirishni jiddiy o'ylamoqda.

Robertning transferiga "Arsenal"dan tashqari kataloniyalik "Barselona" ham anchadan beri qiziqish bildirmoqda. Tomonlar bir oyga yaqin muzokaralar olib borishdi, biroq hozircha kelishuv yakunlangani yo'q.

Polshalik hujumchi "Bavariya"da 2014 yilning yozidan beri o'ynamoqda, uning shartnomasi keyingi mavsum oxirigacha amal qiladi. Forvardning transfer narxi 50 million evroga baholanmoqda.