Yil transferi! Ha, ha, Mbappe ertagi yakunlanlanishiga oz fursat qoldi

Kilian Mbappe dunyodagi eng qimmat futbolchi hisoblanadi. Transfermarkt ma'lumotlariga ko'ra, frantsiyalik 160 mln evroga baholangan.23 yoshli hujumchi joriy mavsumda "PSJ" safida barcha turnirlardoirasidagi 44ta uchrashuvda qatnashib, 36ta gol va 21 golga assistentlik qildi. Umuman olganda, Kilian joriy mavsumda 71 golda ishtirok etdi. Hujumchi XXI asrda o'ynagan barcha frantsuz futbolchilari orasidagi eng yaxshi natijani qayd etdi. U 2002/2003 yilgi mavsumda gol+pas tizimi bo'yicha klub va milliy terma jamoa safida 68 ochko to'plagan "Arsenal"ning sobiq hujumchisi Terri Anrining natijasini yangiladi.

Mbappe shu yozda Parijni tark etib, “Real” bilan shartnoma imzolashga yaqin turibdi. Futbolchining mavsumdagi maoshi soliqlardan tashqari 25 mln evroni tashkil qiladi (soliq bilan qo'shib hisoblasa, 50 mln evro). Shuningdek, klub bilan shartnoma imzolagani uchun yana 100 million bonus oladi. Agar barchasi amalga oshsa, Mbappe "Real Madrid"ning eng ko'p maosh oladigan futbolchisiga aylanadi. Hozirda madridliklar tarkibida Eden Azar eng ko'p maosh oladi – 1 mavsumga 14,5 million evro.

"PSJ" Mbappeni jamoada saqlab qolish borasida umidini uzgan. Frantsiya klubining internet-do'koni hujumchining liboslarini sotish to'xtatildi. O'tgan haftada "PSJ" Kilianni olib qolishga ishonchi komil edi va uni ko'ndirish uchun qo'lidan kelgan hamma narsani qildi. Mbappega katta maosh (mish-mishlarga ko'ra, oyiga 4,9 million evro), klub imijdan 100 foizlik daromad, shuningdek, tarkib borasida qarorlar qabul qilishi, murabbiyni tanlash va sardorlik bog'ichini berishni va'da qildi.

Ammo “PSJ”ning barcha urinishlari besamar ketdi. Klub hozirda 23 yoshli hujumchini saqlab qolishga harakat ham qilmayapti. Mbappe uchun pul hech qachon hal qiluvchi omil bo'lmagan. Kilian har doim "Real Madrid"da o'ynashni istagan.

Mbappe kelajagi haqida kelasi hafta oxirigacha qaror qilib, 28 may kuni bo'lib o'tadigan Chempionlar ligasi finali oldidan “PSJ”ni tark etishini e'lon qilishi taxmin qilinmoqda. 21 may kuni Parij klubi Liga 1 musobaqasidagi so'nggi tur uchrashuvini o'tkazadi. Unda klub o'z maydonida “Mets”ni qabul qiladi. Katta ehtimol bilan bu o'yin frantsiyalik futbolchi uchun parijliklar tarkibidagi oxirgi uchrashuv bo'lishi mumkin. "Real Madrid" Mbappe transferini "Liverpul"ga qarshi Chempionlar ligasi finalidan so'ng e'lon qilishi kutilmoqda.

Mbappe "Real"ga erkin agent sifatida o'tadi. Klub futbolchiga birgina imzosi uchun katta pul taklif qilmoqda, lekin nima bo'lgan taqdirda ham dunyodagi eng qimmat o'yinchisi Madrid klubiga tekinga o'tadi. 2009 yilda "Real Madrid" Krishtianu Ronaldu va Karim Benzemani jami 129 million evro evaziga sotib oldi. Bu transferlar to'liq o'z samarasini bergan. Ronaldu (450) va Benzema (323) klub tarixidagi eng ko'p gol urgan futbolchi hisoblanadi. Shuningdek, portugaliyalik va frantsiyalik sheriklarining gol urishi uchun ham ko'p imkoniyat yaratib bergan: Benzema – 159 assist, Ronaldu – 131 assist.

Agar, Mbappe Madridda uzoq qoladigan bo'lsa, “Real”ning ikki asosiy goleadorlarining statistikasidan o'zib ketishi aniq. Yosh hujumchida klubning ramziga aylanishi uchun barcha imkoniyatlar mavjud. Bu transferga "Real" bosh murabbiyi Karlo Anchelotti quyidagicha fikr bildirdi:

“Menimcha, klubning kelajagi borasida qaror qabul qilingan. “Real” prezidenti hammasini oldindan rejalashtirib qo'ygan. Bu Mbappening "Real"ga o'tishini anglatadimi? Men bu haqida hali gapirmadim”, - deydi Anchelotti transferga ishora qilib.

Shuningdek, "Real Madrid"ning sobiq bosh murabbiyi Fabio Kapello shunday dedi:

“Mbappening transferi haqida ko'p gapirilmoqda, ammo bu amalga oshadigan bo'lsa, bu albatta, “Real” bo'ladi. Mbappe yosh va juda iqtidorli, o'z yoshida dunyoning eng yaxshi futbolchilaridan biri hisoblanadi. Kilian ko'p yillar davomida "Real Madrid"ning asosiy futbolchisi bo'lishiga ishonchim komil. Benzema va Mbappe tandemi bir necha yillar davomida muxlislarni xursand qilishi tayin”.

Yilning eng shov-shuvli transferi haqidagi e'lon qilinishiga oz fursat qolmoqda. L’Equipe nashri xabariga ko'ra, Kilian faoliyatini davom ettiradigan klub nomini yakshanba, 22-may kuni rasman e'lon qiladi. Bu Telefoot nashri orqali translyatsiyasi qilinishi aytilgan. Mbappeni keyingi mavsumda "Real"da ko'rish juda qiziq bo'ladi. 34 yoshli Benzema katta ehtimol bu yil "Oltin to'p"ni qo'lga kiritadi va bu Kilian uchun haqiqiy motivatsiya bo'lishi tayin.