"Barselona" Levandovskining transferi uchun qancha mablag' sarflash niyatida ekanligi ma'lum qilindi

"Bavariya" hujumchisi Robert Levandovskining "Barselona"ga o'tishi haqidagi "serial" davom etmoqda. Kataloniyaliklar futbolchi uchun to'lashga tayyor bo'lgan narxni aytishdi.

Ispaniya matbuotiga ko'ra, "Barselona" shartnomasi bir yildan keyin tugaydigan futbolchining transferi uchun to'lashi mumkin bo'lgan maksimal narx 60 million evro hisoblanadi.

Oldinroq polshalik hujumchi ispan jamoasi bilan shaxsiy shartnoma tafsilotlarini kelishib olgani haqida ma'lumotlar paydo bo'lgandi, ammo "Bavariya" rahbarlari Levandovski myunxenliklar bilan kelishuvini to'liq ishlab chiqishi kerakligini ta'kidlamoqda.

Biroq, "Bavariya" ustozi Yulian Nagelsmann jamoada o'ynashni istamaydigan futbolchi bilan ishlashdan ma'no ko'rmayotganini aytdi.

Levandovski joriy mavsumda Bundesligada 34 ta o'yin o'tkazib, 35 ta gol urdi va 3 ta golga assistentlik qildi.