«Real» qanday futbolchini qo'lga kiritmoqda?

Kutilganidek, «Chelsi» himoya chizig'i etakchisini o'z safida olib qololmadi. Germaniyalik Antonio Ryudiger kelasi mavsumdan Ispaniya La Ligasida hujumchilar uchun dahshatli qoya-to'siqqa aylanadi.

Ha, 2022 yilning asosiy transfer dostonlaridan biri nihoyasiga etmoqda. Oxirgi yillarda APLning eng yaxshi himoyachilari safiga qo'shilgan Ryudiger o'zining eng yuqori cho'qqisida «Chelsi»ni tashlab ketmoqda. Yana mutlaqo tekin...

Go'yoki, Evropaning yarmi Ryudigerga talabgor edi. Biroq «Chelsi» shunday vaziyatda germaniyalik futbolchi ortidan pul undirolmadi. Nega? Bu chalkash masala. Keling, avvalo, Ryudiger naqadar ajoyib himoyachi ekanligiga dalillar keltiraylik. Antonio «Roma»dan «Chelsi» safiga ko'chib o'tganida, goho ideal o'yin ko'rsatadigan, ba'zan tekis joyda butun jamoaga pand beradigan himoyachi edi. Keyingi 4,5 yil ichida ko'p narsa o'zgardi. Mana, APLning joriy mavsumiga daxldor ba'zi statistik raqamlar:

• Ryudiger - «Chelsi» asosiy tarkibining «temir» vakili: APLning o'zida 28ta o'yin va 3ta gol

• Ryudiger aniq uzatmalar bo'yicha APLda kuchli 10talikka kiradi - 1822ta (jami - 2014ta). Taqqoslash uchun aytsak, Brunu Fernandesh yoki Jorjinoda aniq uzatmalar soni bundan kam.

• Ryudiger 73 foiz yakkakurashda ustun keldi. Deylik, Rafael Varan yoki Tyago Silva kabi baquvvat himoyalar ham bunday yuqori ko'rsatkichga ega emaslar.

• Ryudiger joriy mavsum havodagi to'p uchun kurashlarda 70 marta ustun keldi. Ruben Diash va yana o'sha Rafael Varan bu borada undan orqada.

Aslida «Chelsi» Ryudiger bilan shartnoma muddatini uzaytirish masalasida o'tgan yil yozda muzokara boshladi. Biroq samarasiz. Amaldagi kelishuvga binoan, haftasiga 150 ming evrodan ko'proq (yiliga 7,8 million evro) maosh olayotgan himoyachi bu miqdor 230 ming evro (yiliga 12 million evro) bo'lishini xohladi. Ryudigerning boshqa talabi: birdaniga 4,5 yillik shartnoma (umumiy summasi 55 million evro) va imzo chekish uchun 20 million evro miqdorida mukofot. «Chelsi» va futbolchi o'rtasidagi muzokara jarayoni cho'zilgani sari transferlar bozorida chinakam dahshat boshlandi. Ya'ni Antonioga birin-ketin «PSJ», «Bavariya», «Barselona», «​​MYu», «Yuventus», «Inter», «Real» va yangi boy - «Nyukasl» jamoalaridan qiziqa boshladi. Mana, OAVda tarqalgan ayrim xabarlarning qisqacha tafsiloti:

• «PSJ» Ryudigerga bir yil uchun 7 million evro taklif qildi, keyinchalik saxiyligi tutib, summani yanada oshirdi. Qisqasi, eng yaxshi shartnomani ilgari surdi.

• Ryudigerning katta talablari tufayli «Bavariya» tezda «o'yin»dan chetga chiqdi.

• Ralf Rangnikning shaxsan o'zi Antonioni «MYu»da ko'rishni istadi. Manchesterliklar bu borada himoyachiga yillik 10 million evro maosh va'da qilishdi, ammo u «Chelsi»ni hurmati o'laroq, jamoaning asosiy raqiblaridan biri safini to'ldirishni istamadi.

• Mart oyida «Yuventus»ning Ryudiger bilan kelishib qo'ygani aytildi, ammo bu asossiz bo'lib chiqdi.

Mana, Ryudiger uchun kurashda «Real» ustun keldi. Karlo Anchelotti klub prezidenti Florentino Peresdan aynan germaniyalik himoyachi bilan shartnoma tuzishni so'radi va u talabga muvofiq ish tutdi. Antonio Madridda yiliga 9 million evro miqdorida maosh oladi. Shartnoma esa 4 mavsumga mo'ljallandi. Germaniyalik futbolchiga qo'shimcha tarzda 8 million evro (bonus) berish ko'zda tutilgan. 29 yoshli himoyachining agenti esa 15 mln. evro oladi. Aytgancha, «Chelsi» shu vaqt ichida Antonioga o'rinbosar qidirdi. OAVda londonlikoarning Bremer («Torino»), Presnel Kimpembe («PSJ») va Ronald Arauxo («Barselona») nomzodini ko'rib chiqishayotgani haqida xabarlar chiqdi. Ammo ko'rinishidan, «aristokratlar» «Sevilya»dan Jyul Kundeni sotib olishga harakat qilishadi, chog'i. Andalusiya jamoasi bu transfer uchun 70 million evro so'ramoqda.

Antonio Ryudigerga nisbatan ko'pincha «yaramas» iborasi ham qo'llaniladi. Nega? Birinchidan, u hujumchilar uchun o'ta rahmsiz raqib  Deylik, hakamga sezdirmay, oyoqqa tepishni xush ko'radi. Yana raqibini muvozanatdan chiqarish provakatsiya ishlatishga usta. Ryudiger ayniqsa, o'tgan yoz bu borada yangi darajaga ko'tarildi. Chunonchi, u Evro-2020 startidan, aniqrog'i, Frantsiya termasiga qarshi 1-tur o'yinidan oldin ancha oshkora gapirdi: «Hamisha yaxshi bo'lish xohishini bir chetga surib, biroz iflos o'ynashimiz kerak». Gap isboti bilan! Antonio birinchi bo'limda Pol Pogbani tishlab olishga urindi. Nega? Buni uning o'zi ham bilmasa kerak. Lekin endi «El-klasiko»da shunday nayranglar ko'rishimiz mumkin.