Xolandning eng yuqori cho'qqisi «Manchester Siti» bo'ladimi?

"Real"dan qabul qilib olingan qaqshatqich zarba oxir-oqibat "Manchester Siti"ni katta va keskin farqli transferga undadi. Balki avvaldan Xoland varianti kun tartibida bo'lgandir, ammo "Etihad"da Foden zarbdor nuqtadan gol urolmagach, pozitsiyali hujum vaqti zarba beruvchi De Bryune mayli, Lyaport bo'lib qolgach, endi harakatlarni tezlatish to'g'ri bo'lardi. Menimcha, Pep yo'llanmani Manchesterda yutqazdi, Madridda emas.

Ikki o'yinda "Real"dan kimlar gol urdi? Benzema, Vinisius va Rodrigo. Barchasi hujumchi. Asli eng to'g'risi va osoni shu emasmi?

Gvardiola Xoland bilan printsiplaridan juda kechdi deb o'ylamayman-u, lekin ularni tahrir qilishga majbur bo'lyapti.

Aslida mutaxassis "Atletiko Madrid"ga qarshi javob o'yinining ikkinchi taymida butkul ajablantirgandi. Men Gvardiola nihoyat qarashlaridan voz kechibdi, deb o'ylagandim. "Real"ga qarshi ikkinchi o'yinda ham goldan keyin yopilib olsa, vaqtdan yutishga urinsa kerak, deb kutdim. Yo'q, unday bo'lmadi. Aksincha, Grilishning vaziyatlarini eslang (Grilishning o'zi alohida mavzu).

Xoland bilan "Siti" kuchayishi aniq. Norvegiyalik uchun esa bu oxirgi nuqta ham bo'lmaydi. Shunisi chog'lab turadi uni. Ya'ni, Erling yaqin besh-olti yilda "Real" yoki "Barselona"da o'ynash uchun ham intiladi. Baribir har qanaqasiga har qaysi superyulduz uchun oxirgi nuqta shu ikki jamoa bo'lib qolsa kerak.

Orif Tolipov.