"Nyukasl" "Barselona" futbolchisi uchun kurashga qo'shildi

"Nyukasl" "Barselona" yarim himoyachisi Filippo Koutino uchun kurashga qo'shildi. Futbolchi ayni damda "Aston Villa"da ijara asosida o'ynamoqda.

Koutinoning Kataloniya klubi bilan amaldagi shartnomasi tugashiga hali bir yil bor, biroq u keyingi mavsumda "Barselona"da qolmasligini allaqachon ma'lum qilgan.

Futbolchiga hozirda ijara asosida to'p surayotgan "Aston Villa" klubi qiziqish bildirmoqda. Jerrard boshchiligidagi jamoa kataloniyaliklardan futbolchining narxini tushirishni so'ragan va kelishuvga erishgan.

Biroq, GOAL portali xabariga ko'ra, "Nyukasl" vaziyatga aralashdi. "Nyukasl" "Barselona"ga dastlabki 40 million evro to'lab, futbolchini o'ziga og'dirib olmoqchi.

Koutino joriy mavsumda APLda 15 ta o'yinda maydonga tushib, 4 ta gol urdi va 3 ta golga assistentlik qildi.