Bu futbolchi «Arsenal»ga qaytmasligi mumkin

«Arsenal» bosh murabbiyi Mikel Arteta yangi mavsumda «Marsel»da ijara asosida o'ynayotgan Vilyam Salibani ortga qaytarish haqida hali bir qarorga kelmagan. Bu haqda The Sun nashri xabar bermoqda.

Manbaga ko'ra, «kanonirlar» bosh murabbiyi frantsiyalik futbolchining Premer-ligada o'ynashga tayyorligiga ishonchi komil emas.

Saliba 2019 yilda «Sent-Eten»dan 30 million evro evaziga «Arsenal»ga o'tgan, biroq londonliklar safida biror marta ham maydonga tushmagan. U uch yil davomida turli jamoalarda ijarada o'ynadi. Joriy mavsumda Saliba «Marsel»da o'ynab, Frantsiya terma jamoasiga chaqiruv oldi.

21 yoshli futbolchining «Arsenal» bilan shartnomasi 2024 yilda tugaydi, shu bois klubga transfer bo'yicha takliflar kela boshlagan. «Marsel» futbolchi uchun 32 million evrodan ko'proq to'lashga tayyor, ammo londonliklar kamida 42 million evro talab qilmoqda.

Joriy mavsumda Saliba olimpiyachilar safida barcha turnirlarda 45 ta o'yin o'tkazdi. Futbolchining Transfermarktdagi narxi 24 mln evro.