«Inter» Aleksis Sanches borasida fikrini o'zgartirdi

«Inter» hujumchisi Aleksis Sanches milanliklar safida qolishi mumkin, deya xabar beradi Calciomercato.

Manbaga ko'ra, chililik futbolchi «Inter» bosh murabbiyi Simone Indzagi uchun asosiy o'yinchi hisoblanadi. Shu boisdan klub rahbariyati avvalroq undan qutulishni rejalashtirgan bo'lsa-da, hujumchini jamoada olib qolish fikriga kelgan.

Sanchesning «neradzurrilar» bilan amaldagi shartnomasi kelasi yilning yoziga qadar mo'ljallangan. 33 yoshli chililik uchinchi mavsumdirki, «Inter» safida to'p surmoqda. Ilgari u «Barselona», «Arsenal» va «Manchester Yunayted» klublari sharafini himoya qilgan.

Sanches joriy mavsumda barcha turnirlarda 31 ta o'yinda maydonga tushib, 7 ta gol va 5 ta golli uzatmani amalga oshirdi.