«Yuventus» nima uchun Ronalduni «Manchester Siti»ga sotmagani ma'lum bo'ldi

«Yuventus» klubi sport direktori Federiko Cherubini hujumchi Krishtianu Ronalduning "Manchester Yunayted"ga o'tishi tafsilotlari bilan o'rtoqlashdi.

Unga ko'ra, "shaharliklar" portugaliyalik futbolchining transferi borasida birinchi bo'lib taklif yuborishgan. Ammo bu taklif "keksa sinora"ni qanoatlantirmagan.

"Angliyaning "Manchester Siti" klubi yuborgan taklif bizga ma'qul kelmadi. "Manchester Yunayted" esa o'zini butunlay boshqacha tutdi. Axir bu klubning o'z an'analari bor. Boshqa voqea ro'y berishi mumkin emas edi, ayniqsa, Ronaldu biz bilan gaplashganidan so'ng.

Biz uni klubda qolish uchun majburlay olmasdik. Biz Ronalduni hurmat qilamiz, ammo mening fikrim klub prezidentiniki bilan farq qiladi: "Yuventus" tarixini buyuk chempionlar, murabbiylar va rahbarlar yozishgan, ammo klub eng asosiysi bo'lib qolaveradi", - dedi Federiko Cherubini.