«Lids» klubi hujumchisini jamoada olib qolish uchun harakat boshladi

«Lids Yunayted» klubi o'z hujumchisi  Patrik Bemford bilan yangi shartnoma imzolamoqchi. «Telegraph» nashrining xabar qilishicha, klub «Tottenxem»dan hujumchi uchun bo'layotgan jiddiy qiziqishlardan xavotirga tushgan.

Chunki London klubi 27 yoshli ingliz uchun Keyn o'rniga yaxshi joy tayyorlab qo'ygan bo'lishi mumkin. Bemford o'tgan mavsumda yorqin o'yin namoyish etib, APL to'purarlar jadvalida ikkinchi o'rinni band etdi. U 17 ta golga mualliflik qilgan va ulardan atigi bittasini penaltidan kiritgan, xolos.

Hujumchi 2018 yilda «Midlsbro» klubidan 7 million funtga xarid qilingan edi. Bemfordning amaldagi shartnomasi 2022 yilning yozigacha mo'ljallangan.