"Napoli" hujumchisi "Inter"ga o'tishi mumkin

"Napoli" va Italiya terma jamoasi hujumchisi Lorentso Insine faoliyatini "Inter"da davom ettirishi mumkin, deb xabar beradi Sky Sport Italia nashri. Manbaga ko'ra, futbolchi "Napoli"ning klub prezidenti Aurelio De Laurentis bilan ziddiyat tufayli shartnomani uzaytirish taklifini rad etgan.

Insinening neapolliklar bilan amaldagi shartnomasi 2022-yilning yozigacha mo'ljallangan. Ma'lum bo'lishicha, "Napoli" rahbariyati Insineni 30 million evroga sotish variantini ko'rib chiqmoqda.

Milanning "Inter" klubi forvard xizmatlariga qiziqish bildirgan.

Insine o'tgan mavsumda "Napoli" tarkibida barcha musobaqalarda 48 ta o'yinda maydonga tushib, 19 ta gol va 11 ta golli uzatma muallifi bo'lgan. Hujumchi Evro-2020da Italiya terma jamoasi tarkibida o'ynadi va jamoa bilan Evropa chempioni bo'ldi.