«Barselona» Rabo bilan muzokaralarni to'xtatib qo'ydi

«Barselona» klubi «PSJ» hujumchisi Adrian Raboning transferidan voz kechish arafasida turibdi.

Tomonlar yanvar oyida muzokara olib borib, 23 yoshli futbolchiga manfaatli shartnoma taklif qilindi. Ammo futbolchining agentlari turli bahonalarni aytib, muzokaraning yakuniy  qismini boshlashga monelik qilaverishdi. Adrienning onasi Veronika "ko'k-anorranglilar" tomonidan berilgan taklifni ko'rib ham chiqmadi. Shuningdek, yarim himoyachi Angliya va Italiyaning ba'zi klublari bilan aloqaga chiqqanidan "Barsa" yaxshi xabardor.

«Barselona» bir necha marta Raboni ogohlantirishiga va ultimatum qo'yishiga qaramay, muzokaralar to'xtab qoldi. Natijada klub o'z taklifini qaytarib oldi.

Futbolchining "PSJ" bilan shartnomasi shu yilning iyul oyida yakuniga etadi. Kataloniyaliklar endi taklif Raboning o'zidan chiqishini kutadi. Adrien "Barsa"da o'ynash ishtiyoqi borligini isbotlasa, jamoa u bilan shartnoma imzolashi mumkin. Ammo bu safar kataloniyaliklar taklif qiladigan shartnoma avvalgisiga qaraganda pastroq bo'ladi.