"Barsa" himoyachisi Evropa grandlari nishonida

"Barselona" himoyachisi Serjino Dest jamoani tark etish niyati yo'q, deb xabar bermoqda Diario Sport.

Manba xabariga ko'ra, "Bavariya", "Yuventus" va Londonning "Arsenal" klublari amerikalik qanot himoyachining transferiga qiziqish bildirishgan. Ammo futbolchi hattoki ushbu klublarning takliflarini tinglamagan. 20 yoshli yigit mazkur jamoalarga faqat "Barselona" haqida o'ylashini va hech qaerga ketmoqchi emasligini aytgan.

Ta'kidlanishicha, Dest rivojlanishda davom etishni istaydi va Kataloniya klubida yutuqlarga erishmoqchi.

O'tgan mavsumda futbolchi La Ligada 30 o'yin o'tkazib, 2ta gol urgan va 1ta golli uzatmani amalga oshirgan.