Sergeevning APL klubiga ehtimoliy transferi Germaniyaning mashhur saytida asosiy mavzuga aylandi

Germaniyaning "Transfermarkt" veb-sayti tahlilchilari O'zbekiston milliy terma jamoasi va Qozog'istonning "Aktobe" klubi hujumchisi Igor Sergeevning APL klubi bo'lmish "Sheffild Yunayted"ga o'tish ehtimolini 3 foizga baholadi.

Ayni paytda, Sergeevning Angliya chempionatiga o'tishi haqidagi mish-mishlar saytdagi asosiy transfer mavzusi bo'lib, O'zbekiston milliy terma jamoasi hujumchisining surati Premer-liga klublari ro'yxatining rus tilidagi versiyasida birinchi sahifada joylashgan.
Veb-sayt aniqlik kiritishicha, ijtimoiy tarmoqlarda sodir bo'lishi kutilayotgan transfer haqidagi ma'lumotlar o'zbekistonlik jurnalist Davron Fayziev tomonidan nashr etilgan. U Qozog'istondagi manbalariga asoslanib, inglizlarning o'zbek goleadoriga qiziqishi haqida xabar bergan.

Igor Sergeev Toshkentning "Paxtakor" klubi tarbiyalanuvchisi hisoblanadi. 2011 yildan boshlab u asosiy jamoada o'ynashni boshlagan. 2016 yilda u yarim mavsumni xitoyning "Beyjing Goan" klubida o'tkazdi. U "Paxtakor" ga qaytdi, ammo 2017 yilda uni BAAning "Al-Dafra" klubi sotib oldi. 2018 yil iyul oyida Sergeev yana "Paxtakor"ga qaytdi. 2021 yilda u Qozog'istonning "Aktobe" jamoasiga erkin agent sifatida kelib qo'shildi.

U "Paxtakor" tarixidagi milliy chempionatlarning eng yaxshi to'purari sanaladi. Igor Sergeev O'zbekiston milliy terma jamoasi safida 54ta o'yin o'tkazib, 17ta gol urgan. "Transfermarkt" xabariga ko'ra, hujumchining qiymati 1,5 million evroga baholanmoqda. Shuningdek, futbolchi QPLda 2021 yilning eng qimmat o'yinchilari o'nligidan joy oldi.