Batshuayi so'nggi daqiqalarda «Kristal Pelas»ga o'tdi

«Chelsi» hujumchisi Mishi Batshuayi transfer oynasining so'nggi daqiqasida «Kristal Pelas»ga o'tdi. Belgiyalik futbolchi yangi jamoasida ijara asosida mavsum oxirigacha o'ynaydigan bo'ldi.

Avvalroq «Monako» Batshuayini ijaraga olish haqida kelishuvga erishgani haqida xabarlar tarqalgandi, ammo «Chelsi» so'nggi pallada o'z fikrini o'zgartirdi. Shuningdek, londonliklar «Tottenxem»ning taklifiga ham rad javobini berishdi. Bundan tashqari, 25 yoshli futbolchiga «Everton», «Vest Xem» va «Betis» klublari tomonidan qiziqish bo'lgandi.

Ushbu mavsum boshidan buyon Mishi Batshuayi ijara asosida «Valensiya» safida o'ynab kelayotgandi. U La liganing 15ta o'yinida maydonga tushib, bitta gol urdi. «Ko'rshapalaklar» rahbariyati yanvar oyida futbolchining xizmatidan voz kechishga qaror qildi.