«Borussiya» yozda Xolandni APL klublaridan biriga sotishi mumkin

Dortmundning «Borussiya» klubi hujumchisi Erling Xoland kelasi yilning yozida Angliya klublaridan biriga o'tishi mumkin. Bu haqda "Daily Mail" xabar tarqatdi.

Manbaga ko'ra, norvegiyalik futbolchining xizmatlariga «Manchester Yunayted» va «Manchester Siti» jamoalari qiziqish bildirishmoqda. Shu bois, «Borussiya» Erlingni 2021 yilning yozida sotishi mumkin. Chunki, 2022 yilda Xolandning shartnomasida 70 million evro miqdorida badal puli kuchga kiradi. Dortmundliklar esa 20 yoshli futbolchining transferidan 100 million evro miqdorida daromad olishmoqchi.

«Borussiya» Xolandni 2020 yilning yanvar oyida «Zaltsburg»dan 20 million evroga sotib olgan edi. U "qora-sariqlar" safida 32ta o'yinda maydonga tushib, 33ta gol urdi va 6ta golga uzatma berdi. Transfermarkt hujumchini 80 million evroga baholagan. Xoland 2020 yilda Evropaning eng yaxshi yosh futbolchisi sovrini — "Golden Boy"ni qo'lga kiritdi.