Messi yanvarda «Manchester Siti»ga o'tadimi? Gvardiola javob berdi

«Manchester Siti» bosh murabbiyi Xosep Gvardiola jamoa qishki transfer paytida yangi o'yinchilarni sotib olishni rejalashtirmayotganini ma'lum qildi.

«Yanvarda yangi xarid? Yo'q, bu aniq. Ixtiyorimda barcha sovrinlar uchun kurash olib borishga qodir fantastik jamoa bor. Yaxshi o'ynayotgan futbolchilar o'ynashda davom etishadi.

Aguero yaxshi formaga kirish uchun harakat qilyapti, ammo u jarohat tufayli uzoq vaqt davomida maydonga tusha olmadi. U 32 yoshda, shuning uchun vaqt kerak. U o'yin amaliyotiga ega bo'lish uchun sidqidildan ishlamoqda hamda haftadan haftaga yaxshi formaga kirib bormoqda. Biz Serxio uchun maxsus mashg'ulotlar grafigini ishlab chiqqanmiz. Oldimizda 7 oylik mavsum kutib turibdi. Hali o'yinlar ko'p, u bizga kerak», — dedi Gvardiola «Manchester Siti» rasmiy saytiga bergan intervyusida.

Avvalroq «shaharliklar» yanvar oyida «Barselona» hujumchisi Lionel Messi bilan muzokara boshlashi haqida xabar tarqatilgan edi. Argentinalik futbolchining o'z klubi bilan shartnomasi joriy mavsum so'ngida yakunlanadi. Shuningdek, ayrim OAV «Man Siti» qishda Messini qo'lga kiritish uchun «Barselona»ga 15 mln funt taklif qilishi mumkinligi haqida ma'lumot tarqatgan edi.