«Barselona»da pul yo'q, biroq Kuman jamoasini kuchaytirishi lozim

«Barselona»da pul yo'q, biroq Kuman jamoasini kuchaytirishi lozim. Stadion.uz amalga oshishi mumkin bo'lgan «Barselona»ning qishki transferlari haqida fikr almashadi.

Markaziy hujumchisiz qiyin

«Luis Suares kelgach, Korea, Lorente, Felish va boshqa hujumdagi yigitlarda erkinlik paydo bo'ldi. U bizning o'yin uslubimizga qolipga tushgandek mos kelmoqda.»

“Atletiko Madrid” sardori – Kokening so'zlarida haqiqat bor. Luis «Barselona»ni tark etgach, Kataloniya klubining markaziy hujumida muammolar ko'zga tashlanib qoldi. Bartameu esa, Kuman bilan birgalikda Luisitoni ushlab qolmay xatoga yo'l qo'ydi. Vaholanki, Kuman urugvaylik futbolchining ketishiga o'zini sababchi deb hisoblamasligini bir necha bor ta'kidlab o'tdi. Nima bo'lgan taqdirda ham, murabbiy qishda sifatli markaziy hujumchi sotib olishga majbur. Fati, Grizman, Dembele, Koutino va Messidan kuchli uchlik yaratish mumkin, ammo ularning birortasi markaziy hujumda to'p surishga qodir emas. Ayni damda, jamoa nishonida turgan Memfis Depay barcha muammolarning echimi bo'lishi mumkin. Gollandiyalik futbolchi bu mavsumda «Lion»ning markaziy hujumida to'p surmoqda. Bu vinger uchun yangilik, ammo «Barsa» uchun ayni muddao! Uni qo'lga kiritish qishda Kumanning asosiy maqsadlaridan biri bo'lishi turgan gap.

Fatining jarohati ham transfer bozoriga chiqishga undamoqda

Balki, Leoni markazga joylashtirish haqida bosh qotirish mumkindir, biroq bu, ofsayd chizig'ida u qadar effekt bermasligi mumkin. Fatining bir muddat tarkibda bo'lmasligi ham yangi hujumchi sotib olishga to'g'ri keladi. Boz ustiga, Fatining kelajakdagi faoliyatini himoya qilish uchun ham hujumchi olish lozim. Sababi, jarohatlar surunkanli bo'lmasligi uchun ham yosh organizmni yuklamalardan saqlash va uni sekin-asta toblab borish lozim. Shu bois, ham «Barselona» uchun yana bir hujumchi kerak.

Yulduzlarni sotish kerak

Afsuski, «Barselona»ning muammosi faqat hujum chizig'ida emas. Himoyada ham muammolar etarlicha. Upamekano yoki Kulibali uchun jamoada pul yo'q. Avvalgidek Messining borligi uchun yulduzlar «Barselona»ga oshiqmay qo'ygan. Argentinalikning o'zi ham tez orada boshqa klubga o'tib ketishi mumkin.

Himoyachilar uchun pul jamg'arish kerak bo'lsa, kimnidir sotishga to'g'ri keladi. Buning uchun nomzodlar ham mavjud. Balki, Gizman transferga qo'yilar? Buni taxmin qilish g'alati, biroq Kumanga sifatli markaziy himoyachi kerak. Ayni damda, nishonda Ryudiger va Erik Garsiyalar mavjud. Qishda ularning qay biri Kataloniyaga kelishi esa, hozircha noma'lumligicha qolmoqda.

Erkin agentlarga murojaat

Kataloniya klubi tushib qolgan moliyaviy ahvoldan faqat erkin agentlar bilan tuzilgan shartnomalargina naf berishi mumkin. Xo'sh, nishonda kimlar bor? Birinchi navbatda hayolimizga «Liverpul» yarim himoyachisi Veynaldum, «Siti»dan Aguero, PSJdan Di Mariya kelishi mumkin, ammo ularning jamoaga kelishi Messining qolishi yoki ketishiga bog'liq. Sababi, Leoning ketishi, butun futbol ommasi uchun «Barselona»ning inqirozini anglatadi. Bu omil transferlarda ham o'z so'zini aytishi turgan gap. Boz ustiga, tez orada klubda yangi prezident saylanadi. Uning kim bo'lishi va qanday siyosat olib borishi katta so'roq ostida qolmoqda. Yangi prezidentning saylanishining o'zi katta transfer voqeasi bo'lishi mumkin.

Ayni damda, «Barselona» yangi transferlarni amalga oshirishi lozim. Bu pullar ham havoga uchib ketmasligi uchun birinchi navbatda murabbiyning rejalaridan o'rin egallagan futbolchilar bo'lish lozim.