Rasman. «Bavariya» Shupo-Moting bilan shartnoma imzoladi

«Bavariya» klubi kamerunlik hujumchi Erik-Maksim Shupo-Moting bilan shartnoma imzoladi. Bu haqda myunxenliklar rasmiy sayti xabar tarqatdi.

31 yoshli futbolchi «Bavariya» safiga erkin agent sifatida qo'shildi hamda jamoa bilan 2021 yilning 30 iyuniga qadar shartnoma imzoladi.

«Bundesligaga qaytish, boz ustiga, Germaniyaning eng katta jamoasi safiga o'tish — ajoyib hissiyot. Kim ham «Bavariya» safida o'ynashni istamasdi? Bu klub safida o'ynash — ulkan sharaf. «Bavariya» o'z oldiga hamisha barcha musobaqalarda g'olib chiqish vazifasini qo'yadi. Men esa ushbu sovrinlarni qo'lga kiritishga chog'langanman», — dedi Kamerun terma jamoasi hujumchisi.

Shupo-Moting faoliyatining aksariyat qismini Bundesligada — «Gamburg», «Nyurnberg», «Maynts» va «Shalke» klublari safida o'tkazgan. Mavsum-2019/20da esa Erik-Maksim «PSJ»da o'ynab, barcha musobaqalar doirasida 20ta o'yinda maydonga tushgan holda 6ta gol urdi va bitta golga uzatma berdi.