«Yuventus»ni tark etadigan ikki futbolchi nomi ma'lum qilindi

Turinning «Yuventus» klubi kelasi haftada Sami Xedira bilan shartnomasini bekor qiladi. Bu haqda italiyalik taniqli jurnalist Fabritsio Romano xabar berdi.

So'nggi ma'lumotlarga ko'ra, tomonlar shartnomani bekor qilish borasida muzokara olib bormoqda. Bir muddat oldinroq Xedira shartnoma bekor qilinishi uchun 3 million evroga ega bo'lishni xohlayotgani aytilgandi. Samining «Yuve» bilan shartnomasi 2021 yil yozida yakuniga etadi. U hozirda yiliga 6 million evro maosh oladi.

Shuningdek, «Yuventus» ayni damda jamoa vingeri Duglas Kostani sotib yuborish borasida o'ylamoqda. Avvalroq braziliyalik futbolchiga «Barselona» va «Vulverhempton»dan qiziqish borligi aytilgandi. Biroq ikkala klubdan ham turinliklarga rasmiy taklif kelib tushmagan.

Ma'lumot uchun, Xedira 2015 yilda «Real»dan «Yuventus»ga o'tgandi. Duglas Kosta esa 2017 yildan beri Turin klubi sharafini himoya qilib keladi. Uning avvalgi jamoasi «Bavariya» edi.