Rasman. «Bavariya» «PSJ» yarim himoyachisini tekinga qo'lga kiritdi

"Pari Sen-Jermen" klubining 18 yoshli futbolchisi Tangi Kuassi "Bavariya" bilan 4 yillik shartnoma imzoladi. Bu haqda myunxenliklar rasmiy xabar tarqatdi.

Germaniyaliklar universal futbolchini bepul qo'lga kiritishdi. Parijliklar Kuassini o'z saflarida olib qolish uchun yanvar oyidan boshlab harakat qilishdi. Ammo yarim himoyachi "PSJ" bilan professional shartnoma imzolashdan bosh tortdi. "Bavariya" xuddi shunday uslub bilan Kingsli Komanni qo'lga kiritgan edi.

Tangi joriy mavsumda "PSJ" safida barcha musobaqalar doirasida 15ta o'yinda maydonga tushib, 3ta gol urdi. Kuassi yanvar oyida parijliklarning EChLda o'ynagan eng yosh futbolchisiga aylangan bo'lsa, u Frantsiya chempionati doirasida "dubl"ga ("Amen"ga qarshi o'yinda — 4:4) erishgan eng yosh o'yinchi bo'ldi.

Transfermarkt Tangi Kuassini 11 mln evroga baholagan. "PSJ" esa uni tarbiyalagani uchun, FIFA qoidalariga muvofiq, 300 ming evro mablag' oladi, xolos.