«Bayer» Xavertsni «Real»ga sotmadi

«Bayer» klubi yarim himoyachi Kay Xavertsni 80 mln evroga «Real»ga sotmadi.

"Bild" nashri tarqatgan xabarga ko'ra, «qaymoqranglilar», shuningdek, 20 yoshli futbolchini sotib olib, uni bir yilga Leverkuzenda ijarada qoldirishni taklif qilishdi. Ammo «Bayer» bunday shartga rozi bo'lmadi. Chunki germaniyaliklar uni 100 mln evroga sotishmoqchi.

Avvalroq «Real» bosh murabbiyi Zayniddin Zidan yozda xarid qilinishi kerak bo'lgan futbolchilar ro'yxatining birinchi pog'onasiga Xavertsni qo'ygani haqida xabar tarqalgan edi. Ammo keyinchalik "Marca" nashri iqtisodiy inqiroz tufayli madridliklar uni sotib olish qobiliyatiga ega emasligini yozgandi.

Xaverts 2019/20 yilgi mavsumda «Bayer» safida 38ta o'yinda maydonga tushib, 15ta gol urdi va 8ta golga uzatma berdi. Uning jamoa bilan shartnomasi 2022 yilning yoziga qadar tuzilgan.