Pyanich «PSJ» rad javobini berdi. U «Barselona»ga o'tmoqchi

«Yuventus» yarim himoyachisi Miralem Pyanich «PSJ»dan tushgan taklifga rad javobini berdi. Bu haqda "El Mundo Deportivo" xabar tarqatdi.

Avvalroq "RMC" nashri 30 yoshli futbolchiga parijliklar qiziqish bildirayotgani haqida xabar tarqatgan edi. Pyanich «Pari Sen-Jermen» sport direktori Leonardo bilan gaplashib, Frantsiya chempionatiga o'tish niyati yo'qligini ma'lum qildi.

Pyanich va «Barselona» shaxsiy shartnoma borasida kelishuvga erishib bo'lishgan. «Yuventus» esa bosniyalik futbolchining o'rniga "ko'k-anorranglilar"dan Artur Meloni olmoqchi. Ammo ushbu variant «Barsa»ni ham, braziliyalik futbolchining o'zini ham qoniqtirmayapti.

Miralem Pyanich ushbu mavsumda «Yuventus» safida 32ta o'yinda maydonga tushib, 3ta gol urdi va 4ta golga uzatma berdi. Uning turinliklar bilan shartnomasi 2023 yilga qadar tuzilgan.