Lautaroning agenti: «Kim ham Messi bilan bir jamoada o'ynashni istamaydi?»

«Inter» hujumchisi Lautaro Martinesning agenti Beto Yake mijoziga «Barselona» tomonidan bo'layotgan qiziqishlar borasida o'z fikrini bildirib o'tdi.

«Kim ham Messi bilan bir jamoada o'ynashni istamaydi? Ularning terma jamoadagi birgalikdagi o'yinlarini muhokama qilganimizda, Lautaro aytgan edi: bunday yoshda Messi bilan Argentina terma jamoasida o'ynash orzusi amalga oshdi.

Shunga qaramay, u mazkur mavzuni ko'taravermaydi. U vazmin yigit. Agar undan qaysi jamoada o'ynashni istaysan, deya so'rasangiz, u hech narsa aytmaydi, grand jamoalarga o'tish istagida kuyib-pishmaydi. Hozirda hech qanday rasmiy ma'lumot yo'q.

Matbuotda go'yoki menga Madrid, Barselona va Angliyadan qo'ng'iroqlar bo'layotgani, futbolchiga «Real», «Barselona» va «Chelsi» klublari qiziqish bildirayotgani haqida mish-mishlar tarqatiladi. Ammo uning transferi borasida hech qanday ish olib borilmayapti», – dedi Martinesning agenti.