«Neymar ertagi» yakuniga etdimi?!

Transfer oynasi yopilishiga 3 kun qolgan bo'lsa-da, butun yoz bo'yi davom etib kelgan "Neymar ertagi" yakuniga etgan ko'rinadi.

"Barselona" delegatsiyasi Monako shahrida bo'lib o'tgan EChL guruh bosqichiga qur'a tashlash marosimidan qaytganidan keyin kecha ertalab yig'ilish o'tkazdi. Unda "PSJ"ning Neymar borasidagi talabi muhokama qilindi.

Parijliklar "ko'k-anorranglilar"ning 3 nafar futbolchisi — Ivan Rakitich, Jan-Kler Todibo va Usmon Dembele hamda 130 million evro miqdorida pul talab qilishdi. Kataloniyaliklarga bu taklif ma'qul kelmadi va ular elektron pochta orqali "PSJ"ga rad javobini berib yuborishdi.

Shundan so'ng "Barsa" rahbariyati bosh murabbiy Ernesto Valverde hamda jamoa sardorlari — Lionel Messi, Serxio Buskets va Jerar Pikega bu haqda xabar berishdi. Bundan tashqari, ular Neymar bilan bog'lanib, uning transferini amalga oshirish uchun qo'ldan kelgan barcha ishni qilishganini, ammo "PSJ" tomonidan qo'yilgan talabni bajarishga klubning iqtisodiy ahvoli yo'l qo'ymasligini aytishdi.

Shu tariqa, katta ehtimol bilan Neymar ushbu mavsumni ham "Pari Sen-Jermen" safida o'tkazadigan bo'ldi.