Leonardo: «Barselona» bizning taklifni qabul qilmadi»

"Barselona" va "PSJ" klublari bir necha kundan beri Neymarning transferi borasida muzokara olib bormoqda. Kecha parijliklar o'z takliflarini "ko'k-anorranglilar"ga ma'lum qilishdi.

Unga ko'ra, "Pari Sen-Jermen" kataloniyaliklardan Rakitich, Dembele va Todibo hamda ancha miqdorda pul so'rashdi. Ammo "Barsa" rahbariyati bu taklifga rad javobini berdi. Buni "PSJ" sport direktori Leonardo ham tasdiqladi.

"Bizning pozitsiyamiz hamisha aniq bo'lgan. "Barselona" Neymarning transferi borasida ilk taklifni 27 avgust kuni, transfer muddati yopilishiga 5 kun qolganida yubordi. Biz variantlarni ko'rib chiqishga tayyormiz. Ammo hali hech qanday kelishuvga erishilmadi. "Barsa" bizning taklifimizni qabul qilmadi.

Yana muzokaralar bo'ladimi? Bu "Barsa"ga bog'liq. Biz so'nggi muddatni qo'ymadik. Tabiiyki, so'nggi muddat — 2 sentyabr, dushanba kuni. Agar bizni qanoatlantiradigan taklif tushsa, buni qabul qilamiz. Aks holda u jamoamizda qoladi", — dedi Leonardo.