Tuxel Dembeleni «PSJ»ga o'tishga ko'ndirmoqda

«Barselona» klubi «PSJ» hujumchisi Neymarni qo'lga kiritish maqsadida Usmon Dembele va Ivan Rakitichni parijliklarga berishga rozi bo'lishdi. Hozirda "PSJ" har ikkala futbolchi bilan muzokara olib bormoqda.

22 yoshli futbolchi "Kamp Nou"ni tark etmoqchi emas, ammo «PSJ» bosh murabbiyi Tomas Tuxel frantsiyalik o'yinchini o'z jamoasiga o'tish uchun ko'ndirishga urinmoqda. Dembelening agenti Mussa Sissiko muzokaralarda ishtirok etish uchun Parijga tashrif buyurdi.

Tuxel va Usmon Dortmundning «Borussiya»sida birga ishlashgan. Yozgi transfer muddati avvalida 45 yoshli mutaxassis Dembeleni ko'ndirishga harakat qilgan edi, ammo bu hech qanday natija bermagan edi.

Neymarning kataloniyaliklar safiga o'tishi Dembele va Rakitichga bog'liq bo'lib turibdi. "Barsa" Rakitichni "PSJ"ga to'laqonli transfer qilmoqchi bo'lsa, Dembeleni 1 yilga ijaraga bermoqchi. Bundan tashqari, «ko'k-anorranglilar» parijliklarga 125 million evro beradi.