Bugun hal bo'lishi mumkin: «Barselona» delegatsiyasi Parijga yo'l oldi

"Barselona" ushbu haftada Neymarning transferini hal qilishga ahd qilgan. "Ko'k-anorranglilar" delegatsiyasi ushbu malasini uzil-kesil hal qilish maqsadida bugun ertalab Parij tomonga yo'lga chiqdi.

Bugun mahalliy vaqt bilan 12:00 (Toshkent vaqti bilan 15:00)da "Barsa" va "PSJ" rahbariyati o'rtasida uchrashuv belgilangan. Kataloniyaliklar delegatsiyasi tarkibiga bosh direktor Oskar Grau, shuningdek, Erik Abidal, Andre Kyuri va Xaver Bordas kiritilgan. Aynan bugungi uchrashuv hal qiluvchi ahamiyatga ega bo'lishi kutilmoqda.

"PSJ" Neymarni sotishga qarshi emas. Ammo buning uchun "Barselona"dan 250 million evro talab qilmoqda. Parijliklar "Barsa"dan Nelson Semedu va Usmon Dembeleni olib, yana 100 million evro so'ramoqda.

Bu futbolchilar "Kamp Nou"ni tark etmoqchi emas, ammo "ko'k-anorranglilar" rahbariyati intizomsiz Dembeleni "Pari Sen-Jermen"ga qarshi emas. Ammo Semedu "Barselona"ga kerak.