Sanches «Inter»ga o'tishga rozi bo'lsa, «MYu» futbolchiga yirik miqdorda pul to'laydi

"Manchester Yunayted" hujumchisi Aleksis Sanches "Inter"ga o'tishga yaqin turibdi. Manchesterliklar chililik futbolchining "neradzurri" safiga o'tishi uchun pul to'lashga ham tayyor.

Daily Mail tarqatgan xabarga ko'ra, "Inter" Sanchesga 6-8 million evro atrofida yillik maosh to'lashga tayyor. Aleksisning "MYu"dagi maoshi 25 million funt sterlingga teng. Mankunianliklar futbolchining qolgan maoshini to'lashga rozi bo'lishdi.

Sanchesning "MYu" bilan yana ikki yillik shartnomasi mavjudligini inobatga olsak, jamoa bu davrda 40 million evro miqdordagi maoshni to'lab beradi. "Inter" hujumchini ijaraga olib, kelasi mavsumda 15 million evroga sotib olishni rejalashtirmoqda.

30 yoshli Sanches 2018 yildan beri "Manchester Yunayted" sharafini himoya qilmoqda. Bu vaqt davomida u barcha musobaqalar doirasida 45ta o'yinda maydonga tushib, 5ta gol urdi va 9ta golga uzatma berdi.