«Milan» Afrika kubogi-2019ning eng yaxshi o'yinchisi transferini e'lon qildi

«Empoli» yarim himoyachisi Ismoil Bennosir «Milan» a'zosiga aylandi. Bu haqda "rossoneri" matbuot xizmati xabar tarqatdi. 21 yoshli futbolchi yangi jamoasi bilan 5 yillik shartnomaga imzo chekdi.

Transfer summasi esa hozircha ma'lum qilinmadi. Avvalroq milanliklar jazoirlik futbolchi uchun 16 million evro to'lashi mumkinligi haqida xabarlar tarqalgan edi.

Bennosir «Empoli» safida ikki yil davomida 77ta o'yinda maydonga tushib, 2ta gol urdi va 7ta golga uzatma berdi. Futbolchi yaqinda bo'lib o'tgan Afrika millatlar kubogida ishtirok etib, Jazoir terma jamoasi bilan qit'a chempionligini qo'lga kiritdi. U musobaqaning eng yaxshi futbolchisi, deya tan olindi.