"Valensiya" "Liverpul"ga o'tayotgan darvozaboniga o'rinbosar qidirmoqda

"Valensiya" "Liverpul"ga o'tish arafasida turgan 23 yoshli darvozabon Giorgi Mamardashvilining o'rniga yangi darvozabon qidirishni boshladi. Bu haqda Football Espana nashri xabar bermoqda.

Manbaning xabariga ko'ra, "Valensiya" va "Liverpul" 35 million evrolik transfer bo'yicha kelishib olishgan, Mamardashvili ingliz klubiga o'tish imkoniyatidan xursand.

Oldinroq gruziyalik darvozabon "mersisaydliklar" taklif qilgan shartnoma shartlarini allaqachon qabul qilgani haqida xabar berilgandi.

Mamardashvilining ispan klubi bilan shartnomasi 2027 yilning yoziga qadar mo'ljallangan. O'tgan mavsumda darvozabon 32 ta o'yinda maydonga tushib, 12 tasida o'z darvozasi daxlsizligini saqlab qolgan, qolganlarida esa 34 ta gol o'tkazib yuborgan. Transfermarkt portalida berilgan ma'lumotlarga ko'ra, futbolchining bozor qiymati 45 million evroni tashkil qiladi.