"PSJ" Sancho g'oyasidan voz kechmadi

Frantsiyaning "PSJ" klubi "Manchester Yunayted"dan qanot vingeri Jeydon Sanchoni transfer qilish fikridan hali ham voz kechgani yo'q.

L’Equipe nashri xabariga ko'ra, angliyalik futbolchini qo'lga kiritishga shaxsan bosh murabbiy Luis Enrike va sport direktori Luish Kampush qiziqish bildirmoqda. Har ikki mutaxassis jamoada ham ijodkorlik, ham samaradorlikni ta'minlovchi vinger bo'lishini xohlaydi.

"Renn" futbolchisi Dezir Due transfer qilinganiga qaramay, "Park de Prens"ning eshiklari Sancho uchun ochiqligicha qolmoqda. Avvalroq, "Manchester Yunayted" angliyalik futbolchini faqat 50 million evro miqdoridagi tovon puli uchun qo'yib yuborishi haqida xabar berilgandi. Sancho o'tgan mavsumning ikkinchi yarmini Dortmundning "Borussiya" jamoasida ijarada o'tkazdi va u Chempionlar ligasi finaliga qadar etib borishiga yordam berdi.