"Jirona" Dovbikning o'rniga Shotlandiya chempionatidan hujumchi topdi

Kataloniyaning "Jirona" klubi "Roma"ga yo'l olgan hujumchi Artyom Dovbikning o'rniga Shotlandiya chempionatidan futbolchi topdi.

Marca nashri xabariga ko'ra, o'tgan mavsumda La Liganing bronza medali sovrindori "Aberdin" hujumchisi Boyan Miovskiga ko'z tikadi. O'tgan mavsumda shimoliy makedoniyalik futbolchi klub safida 53ta o'yin o'tkazib, 26ta gol urgan.

Transfermarkt portali ma'lumotlariga ko'ra, forvardning narxi 4 million evroni tashkil qiladi. 25 yoshida hujumchi hali o'zining eng yuqori cho'qqisiga chiqmagan va "Jirona"da rivojlanishda davom etishi mumkin.

Shotlandiyaga ko'chib o'tishdan oldin Miovski Vengriyada va vatani Shimoliy Makedoniyada o'ynagan.