Matip de Ligtni "MYu"ga o'tishiga yordam berishi mumkin

"Liverpul"ning sobiq himoyachisi Joel Matip "Manchester Yunayted"ga "Bavariya"dan Matteys De Ligtni sotib olishga yordam berishi mumkin.

Eslatib o'tamiz, Matip o'tgan mavsum oxirida, shartnomasi muddati tugagach, "Liverpul"ni tark etgandi. Ko'rinishidan, 32 yoshli kamerunlik himoyachi avvalroq "Shalke-04"da o'ynagan Germaniyaga qaytmoqchi.

Sky Sport Germany nashri xabariga ko'ra, Matip Leverkuzen "Bayer" bilan "juda ijobiy muzokaralar olib bordi". Joel boshqa imkoniyatlarga ega bo'lishiga qaramay, Leverkuzenga o'tishdan manfaatdor.

"Bayer" erkin agentga aylangan Matipni o'z navbatida "Bavariya" tomonidan qidirilayotgan Jonatan Ta o'rniga o'rinbosar sifatida ko'rmoqda.

Agar "Bavariya" Tani sotib olsa, bu De Ligtni ketishga yaqinlashtiradi. Matteys allaqachon “MYu” bilan kelishib bo'lgan, biroq “qizil iblislar” hali uning narxi borasida Myunxen klubi bilan kelisha olishmagan.