"Roma" Dovbikning "Atletiko"ga o'tishiga halaqit qilmoqda

"Roma" "Jirona"dan Artem Dovbikni sotib olishni rejalashtirmoqda.

Avvalroq 27 yoshli hujumchi "Atletiko" bilan shartnoma imzolashdan oldin kelishuvning yakuniy tafsilotlarini muhokama qilish uchun Madridga kelishi xabar qilingandi.

Insayder Janluka Di Martsioning so'zlariga ko'ra, Italiya klubi "Jirona" va "Atletiko"ning ukrainalik hujumchisi o'rtasidagi muzokaralarga aralashishi mumkin.

Qayd etilishicha, bu klub katta ehtimol bilan "Roma" hisoblanadi. Rim klubi rahbariyati "Chelsi"ga qaytgan Romelu Lukaku o'rniga hujumchi topish niyatida.

Shuningdek, ukrainalik forvard hali "Atletiko"ga o'tishga yakuniy rozilik bermagani xabar qilingan.

Dovbik o'tgan mavsum La Ligada 36 o'yinda 24 ta gol urib, 8 ta golli uzatmani amalga oshirib, eng yaxshi to'purarga aylandi.