"Borussiya" Sanchoning "MYu"dagi maoshining uchdan bir qismini to'laydi

Dortmundliklar Jeydon Sanchoga "Manchester Yunayted"dan ijaraga olgan vaqtida maoshining uchdan bir qismini to'laydi.

The Times nashri xabariga ko'ra, nemis klubi Jeydonning "Manchester Yunayted"da olti oy davomida oladigan summasining uchdan bir qismini - 2,6 million funt (3 million evro)ni o'z zimmasiga olishga tayyor. Qolgan 5,2 million funt sterling (6 million evro)ni esa, Sancho mavsumning ikkinchi yarmida klubda o'ynamasligiga qaramay, “Yunayted”ning o'zi to'laydi.

Agar dortmundliklar Sanchoga "Manchester Yunayted"da ishlayotgan haftasiga to'liq 300 ming funt to'lashga rozi bo'lsa, u jamoaning eng ko'p maosh oluvchi futbolchisiga aylanadi va bu kiyinish xonasidagi muhitni buzishi mumkin edi.

Hozirda "Borussiya"dagi eng yuqori maosh Niklas Zyule bo'lib, u haftasiga 166 ming funt (taxminan 193 ming evro) oladi.

Oldinroq klublar Sanchoning ijara shartlari bo'yicha kelishib olgani ma'lum bo'lgandi. U ertaga "Borussiya"ga o'tishi mumkin.

Eslatib o'tamiz, 2021 yilning yozida Sancho "Borussiya"dan 85 million evro evaziga "Manchester Yunayted"ga o'tgan edi. U avgust oyidan beri "Yunayted"da bosh murabbiy Erik ten Xag bilan mojaro tufayli o'ynamadi.