"Barselona" Rokening shartnoma muddatini ma'lum qildi

Chorshanba kuni "Barselona" hujumchi Vitor Roke Kataloniyaga kelganini e'lon qildi. Braziliyalik futbolchi jamoa bilan mashg'ulotlarni boshlash arafasida.

"Ko'k-anorranglilar" press-relizida ta'kidlanishicha, Rokening klub bilan shartnomasi 2031 yilning iyun oyi oxirigacha amal qiladi. Unda 500 million evroga sotib olish varianti mavjud.

Eslatib o'tamiz, Vitor Rokening "Atletiko Paranaense"dan "Barselona"ga o'tishi yozda amalga oshirilishi kerak edi, biroq Ispaniya La Ligasi giganti bu jarayonni tezlashtirishga qaror qildi.

"Barselona" ayni damda Ispaniya chempionati turnir jadvalida to'rtinchi o'rinni egallab turibdi. Jamoa navbatdagi o'yinni 4 yanvar kuni safarda "Las-Palmas"ga qarshi o'tkazadi.