"Arsenal" senegallik hujumchini kuzatmoqda

Londonning "Arsenal" klubi "Salernitana" hujumchisi Bulaye Diani o'z safiga qo'shib olmoqchi, deya xabar bermoqda Tribal Football nashri.

Manbaga ko'ra, italyan klubi 27 yoshli senegallik futbolchini 22 million evroga sotish imkoniyatini ko'rib chiqishga tayyor.

Shuningdek, Dia transferi uchun "Everton" ham kurash olib boradi.

Dia 2023 yilning iyulida "Vilyarreal"dan "Salernitana"ga ko'chib o'tgandi. Transfer summasi 12 million evroni tashkil etdi. O'yinchining klub bilan shartnomasi 2026 yilning yoziga qadar mo'ljallangan. Transfermarkt portali hujumchini 22 million evroga baholamoqda.

Joriy mavsumda Dia 12 ta o'yin o'tkazib, 4 ta gol urdi.

"Arsenal"da hozirda ikkita markaziy hujumchi bor: Gabriel Jezus va Eddi Nketia.

17-turdan so'ng “Arsenal” 39 ochko bilan Angliya chempionatida peshqadamlik qilmoqda. "Liverpul" ikkinchi o'rinda (38 ochko).