Santi Minani Rossiya klublari o'z safiga qo'shib olishdan bosh tortdi

Hujumchi Santi Minaning vakillari Rossiya Premer-ligasining bir nechta top-klublariga futbolchi xizmatlarini taklif qilishgan, biroq jamoalar uning hatti-harakati tufayli rad etishgan, deb xabar bermoqda Metaratings nashri.

Hozirda erkin agent maqomida bo'lgan ispaniyalik futbolchi Rossiyaga ko'chib o'tishga tayyor edi, ammo vatanidagi jinoiy ish tufayli klublar futbolchiga qiziqish bildirmadi. 2022 yilning may oyida futbolchi Almeriya sudi tomonidan jinsiy zo'ravonlik sodir etgani uchun to'rt yillik qamoq jazosiga hukm qilingan edi.

Mina yuqori sudga apellyatsiya shikoyati bergani uchun hozirda garov puli bilan ozod etilgan. Yozgi transferlar oynasi vaqtida OAV hujumchining "Sampdoriya"ga o'tishga yaqin qolgani haqida xabar bergandi, biroq italyan klubi muxlislarining noroziligi kelishuv amalga oshishiga to'sqinlik qildi.

Ispaniyada Mina "Valensiya" va "Selta"da o'ynagan. Milliy chempionatda u 268 o'yin o'tkazib, 63 gol urgan va 25 golga assistentlik qilgan.