"Nottingem Forest" bugun "Chelsi" futbolchisining transferini yopmoqchi

"Nottingem Forest" klubi "Chelsi" yarim himoyachisi Kallum Xadson-Odoi bilan shartnoma imzolaydi. Bu haqda jurnalist Fabritsio Romano xabar bermoqda.

Eslatib o'tamiz, o'tgan mavsumni 22 yoshli angliyalik futbolchi "Bayer"da ijarada o'tkazdi. Xadson-Odoi Leverkuzenning 21 o'yinida maydonga tushib, bitta gol urdi va bitta golli uzatmani amalga oshirdi.

Xadson-Odoi “Chelsi” tarbiyalanuvchisi hisoblanadi. Umuman olganda, vinger London jamoasi uchun 126 o'yin o'tkazib, 16 gol urgan va 22 golga assistentlik qilgan. Transfermarkt portali hozirda angliyalik futbolchini 15 million evroga baholamoqda.