"Barselona" Dembelening hujjatlarini "PSJ"ga yubormayapti. Usmon jamoaning bugungi mashg'ulotlariga chaqirildi

Usmon Dembelening "PSJ"ga o'tishi ortga surildi.

Eslatib o'tamiz, parijliklar klubi "Barselona" vingeri bilan 5 yillik shartnoma borasida kelishib oldi. Futbolchining transferi uchun parijliklar 50 million evro to'lashlari kerak, bu mablag'ning yarmi futbolchi va uning agentiga tushishi mumkin. Xabar qilinishicha, "PSJ" dushanba kuni transferni amalga oshirishni rejalashtirmoqda.

Biroq, RMC Sport nashri xabariga ko'ra, "Barselona" transferni tasdiqlash uchun "PSJ"ga hujjatlarni yuborishga shoshilmayapti. Kataloniya klubi futbolchini bugun soat 18:30da boshlanadigan mashg'ulotlarga chaqirdi.

Shunga qaramay, Parij klubidagi manbalar "PSJ" xotirjam va transferga ishonch bildirishini aytishmoqda. Frantsuzlarning fikricha, shu yo'l bilan "Barselona" futbolchini sotish uchun kattaroq summa olishga harakat qilmoqda.