Bitta javobga 9000 «layk»

Ko'pchilik Fabritsio Romanoni sayyoramizdagi eng kuchli futbol insayderi sifatida ta'riflaydi.

Zero, italiyalik jurnalist «tvit» va videolavha berishda hamisha maksimal darajada aniqlikka tayanadi. Lekin ba'zida muxlislar (foydalanuvchilar) hattoki, uni ham izdan chiqarish yo'lini topishadi.

Evrofutbolni diqqat bilan kuzatib boruvchilar «Sporting» vakili Manuel Ugarte atrofida yuzaga kelgan «doston»dan xabardor bo'lsalar kerak. Urugvaylik yosh tayanch yarim himoyachisiga asosan «Chelsi» va «PSJ» da'vogarlik qildi, yakunda bu «poyga» Angliya klubi foydasiga hal bo'ladigandek ko'rindi ham. Biroq shayxlar oxirgi pallada harakatni kuchaytirishdi va Ugarte oxir-oqibat, Parij tomon qadam tashladi. Albatta, Romano o'z odatiga muvofiq, yozning eng yirik transferlaridan biri («PSJ» Ugarte uchun 60 million evro to'laydi) haqida ham tezkor ravishda ma'lumot berdi. Bu esa yosh iqtidor uchun kurashda muvaffaqiyatsizlikka uchragan «Chelsi» muxlislariga yoqmadi, albatta. Har holda, alamzada fanatlardan biri «Tvitter» tarmog'ida Romanoga oshkora hamla qildi: «Qaniydi, Fabritsio Er yuzidan butunlay yo'qolsa...».

Romano bu «tvit»ni ko'rib, qattiq g'azablandi, shekilli, o'sha muxlisning o'ziga javob yozdi: «Ehtimol, avvalo, sahifam kuzatuvchilari qatoridan chiqib ketishing kerakdir? Har holda, bu Er yuzidan g'oyib bo'lishimni orzu qilishdan oldin tashlangan yaxshigina qadam bo'ladi». Qarangki, Fabritsio bu bilan tinchlanmadi. Aksincha, Ugartening «Chelsi»ga o'tishi haqida bergan ma'lumoti ortidan o'sha muxlisdan qabul qilgan «tvit»ni topib, ikkinchi javob zarbasini yo'lladi. E'tiborli tomoni, fanat o'sha xabar uchun Romanoga minnatdorchilik bildirgan ekan. «Qiziq, 3 kuncha oldin hayotingdagi eng yaxshi kunlardan birini taqdim etganimni yozganding, endi esa Er yuzidan butunlay yo'qolishimni istayapsan. Balki chorshanba kuni singlingga uylanishimni so'rab, keyin akkauntimni o'chirib tashlarsan...». Fakt shuki, insayder ushbu ikki «tvit» vositasida jami 11 ming «layk» to'pladi. Shundan 9 mingi birinchisiga bosildi. Aytish o'rinli, Fabritsio Romano bunga qadar hech qachon g'azabini bunchalik oshkora bildirmagandi.

Manba: «Interfutbol» gazetasi